រូបថតរបស់ស្ត្រីរកស៊ីផ្លូវភេទឈ្មោះ ប៉ែន សុគន្ធា ហៅស្រីម៉ៅ កាលពី៣ឆ្នាំមុន។ Photo Provided
ក្រុមអង្គការសង្គមស៊ីវិលជាង ៣០ស្ថាប័ន អំពាវនាវដល់ស្ថាប័នពាក់ព័ន្ធឲ្យរកយុត្តិធម៌ដល់ស្ត្រីរកស៊ីផ្លូវភេទមួយរូប ដែលលង់ទឹកស្លាប់នៅពេលក្រុមសន្តិសុខខណ្ឌដូនពេញ ដេញចាប់ក្រុមស្ត្រីរកស៊ីផ្លូវភេទ។ ក្រុមអង្គការទាំងនោះចាត់ទុកការបណ្ដែតបណ្ដោយមិនរកយុត្តិធម៌សម្រាប់ស្ត្រីរងគ្រោះ នឹងមានឥទ្ធិពលមិនល្អដល់សន្តិសុខ សុវត្ថិភាព យុត្តិធម៌ និងសិទ្ធិរបស់ស្ត្រី។
ក្រុមអង្គការសង្គមស៊ីវិលដែលធ្វើការងារជាមួយពលរដ្ឋប្រកបការងារងាយរងគ្រោះ លើកឡើងថា នៅពេលដែលស្ត្រីនៅតែបន្តប្រឈមនឹងការរើសអើង ការមាក់ងាយនៅក្នុងសង្គម នឹងបណ្ដាលឲ្យមានអំពើហិង្សាធ្ងន់ធ្ងរ និងការគំរាមកំហែងគ្រប់រូបភាពរហូតដល់អ្នករងគ្រោះបាត់បង់ជីវិត។
ក្រុមដដែលនេះបានយកការស្លាប់របស់នាង ប៉ែន សុគន្ធា ហៅស្រីម៉ៅ គឺជាករណីជាក់ស្ដែងនៃអំពើហិង្សាទៅលើស្ត្រី។
នាយកប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព ដែលឋិតក្នុងចំណោមមន្ត្រីអង្គការសង្គមស៊ីវិលរួមគ្នាចេញលិខិតចំហ មានប្រសាសន៍ថា ដ្បិតតែនាង ប៉ែន សុគន្ធា ជាស្ត្រីរកស៊ីផ្លូវភេទ នាងក៏ត្រូវទទួលបានកិច្ចការពារក្នុងនាមជាស្ត្រីខ្មែរមួយរូប នៅពេលដែលរដ្ឋាភិបាលបានផ្ដល់សច្ចាប័នលើបទដ្ឋានច្បាប់ដែលគាំពារសិទ្ធិស្ត្រី និងការពារស្ត្រីពីការរើសអើងនានា៖ «»។
នៅក្នុងលិខិតចំហរបស់ក្រុមអង្គការសង្គមស៊ីវិលដដែល បានស្នើដល់ស្ថាប័នពាក់ព័ន្ធមួយចំនួនក្នុងនោះរួមមាន ក្រសួងកិច្ចការនារី ក្រសួងមហាផ្ទៃ សាលារាជធានីភ្នំពេញ និងស្ថាប័នពាក់ព័ន្ធមួយចំនួនទៀត។
ក្រុមអង្គការសង្គមស៊ីវិលដដែលស្នើថា ក្រសួងកិច្ចការនារី អន្តរាគមន៍តាមការសហការជាមួយភាគីពាក់ព័ន្ធ ចាត់វិធានការទៅតាមផ្លូវច្បាប់ ដើម្បីរកយុត្តិធម៌ឲ្យជនរងគ្រោះ និងគ្រួសារ។ ជាមួយគ្នានេះ ក៏ស្នើទៅក្រសួងមហាផ្ទៃ និងក្រសួងយុត្តិធម៌ ឲ្យអនុវត្តតាមនីតិវិធី ដើម្បីលើកកម្ពស់នីតិរដ្ឋ និងលុបបំបាត់និទ្ទណ្ឌភាព ឬភាពគ្មានទោសពៃរ៍។ លើសពីនេះ ក្រុមអង្គការសង្គមស៊ីវិល បានស្នើដល់ស្ថាប័នរដ្ឋាភិបាល និងអង្គការសង្គមស៊ីវិលពាក់ព័ន្ធនានា សហការ ពង្រឹងបន្ថែមនូវយន្តការ និងបរិយាកាសគាំពារតម្លៃ និងសិទ្ធិស្ត្រី ដោយផ្ដល់សេវាផ្លូវច្បាប់ សេវាសុខភាព និងសេវាចាំបាច់មួយចំនួនទៀតក្នុងន័យទប់ស្កាត់ និងការពារស្ត្រីពីការរើសអើងការមាក់ងាយក្នុងរូបភាពផ្សេងៗ។
ចំណែកសំណើទៅសាលារាជធានីភ្នំពេញ ក្រុមនេះបានស្នើឲ្យបញ្ឈប់ការប្រើប្រាស់កងសន្តិសុខក្នុងការគំរាមកំហែង ចុះបង្ក្រាប និងប្រើហិង្សាលើអ្នកប្រកបរបរផ្លូវភេទ និងស្ត្រីធ្វើការតាមគ្រឹះស្ថានសេវាកម្សាន្តក្រោមរូបភាពរក្សាសន្តិសុខសណ្ដាប់ធ្នាប់។
ឆ្លើយតបនឹងសំណើនេះ អ្នកនាំពាក្យរដ្ឋបាលសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា កន្លងទៅ ក្រុមសន្តិសុខដែលជាប្រជាការពារ បានជួយច្រើនទៅដល់ការងាររបស់អាជ្ញាធរនៅតាមខណ្ឌនីមួយៗ៖ «»។
ក្រុមអង្គការសង្គមស៊ីវិល បានរំឭកនៅក្នុងលិខិតចំហថា ក្រុមសន្តិសុខខណ្ឌដូនពេញ កាលពីយប់ថ្ងៃទី១ ខែមករា បានដេញតាមចាប់ក្រុមស្ត្រីរកស៊ីផ្លូវភេទ ហើយក្នុងពេលនោះ មានស្ត្រីរកស៊ីផ្លូវភេទម្នាក់ គឺនាង ប៉ែន សុគន្ធា បានធ្លាក់ទឹកនៅម្ដុំចំណតទូកទេសចរណ៍ ហើយនាងបានលង់ទឹកស្លាប់ដោយសពរបស់នាងត្រូវគេរកឃើញនៅពីរថ្ងៃបន្ទាប់។
អ្នកនាំពាក្យរដ្ឋបាលសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា ក្រុមសន្តិសុខខណ្ឌ បានបំពេញតួនាទីរក្សាសណ្ដាប់ធ្នាប់តាមធម្មតា ពុំមានអ្វីប្លែកទេ។ លោកបន្តថា ករណីនេះឋិតក្នុងការស៊ើបអង្កេតរបស់អាជ្ញាធរនៅឡើយ៖ «»។
អ្នកតំណាងរាស្ត្រគណបក្សសង្គ្រោះជាតិ ចំនួន ៦នាក់ បានស្នើតាមរយៈប្រធានសភាទៅក្រសួងចំនួន៣ ឲ្យស្វែងរកយុត្តិធម៌ដល់នាង ប៉ែន សុគន្ធា ក្នុងនោះរួមមានក្រសួងមហាផ្ទៃ ក្រសួងយុត្តិធម៌ និងក្រសួងកិច្ចការនារី។ ប្រធានរដ្ឋសភា លោក ហេង សំរិន កាលពីថ្ងៃទី២៤ ខែមករា បានចារបញ្ជូនលិខិតនោះទៅក្រសួងទាំង៣ នោះរួចរាល់ហើយដែរ។
ក្នុងលិខិតទៅរដ្ឋមន្ត្រីក្រសួងមហាផ្ទៃ ក្រុមអ្នកតំណាងរាស្ត្រស្នើឲ្យសុំបង្កើតគណៈកម្មការអព្យាក្រឹត ដើម្បីរកយុត្តិធម៌ដល់ស្ត្រីរកស៊ីផ្លូវភេទឈ្មោះ ប៉ែន សុគន្ធា។ ក្នុងលិខិតមួយទៀត ស្នើឲ្យរដ្ឋមន្ត្រីក្រសួងយុត្តិធម៌ អន្តរាគមន៍ទៅអយ្យការអមសាលាដំបូងរាជធានីភ្នំពេញ ឲ្យមានការកសាងសំណុំរឿងដែលអាចឈានទៅចោទប្រកាន់ក្រុមសន្តិសុខខណ្ឌដូនពេញ។ ចំណែកលិខិតមួយទៀត ស្នើឲ្យរដ្ឋមន្ត្រីក្រសួងកិច្ចការនារី ជំរុញវិធានការផ្លូវច្បាប់ក្នុងករណីនេះ និងស្នើទៅក្រសួងមហាផ្ទៃ ឲ្យបកស្រាយពីតួនាទី និងភារកិច្ចរបស់ក្រុមសន្តិសុខ។
ឆ្លើយតបនឹងលិខិតនេះ មន្ត្រីនាំពាក្យនៃក្រសួងយុត្តិធម៌ បានប្រាប់សារព័ត៌មានក្នុងស្រុកថា បានបញ្ជូនលិខិតនេះបន្តទៅអយ្យការសាលាដំបូងរាជធានីភ្នំពេញ ឲ្យពិនិត្យសំណុំរឿងនេះ។
អ្នកនាំពាក្យអយ្យការសាលាដំបូងរាជធានីភ្នំពេញ លោក លី សុផាណា ប្រាប់អាស៊ីសេរីតាមបណ្ដាញទំនាក់ទំនងតេឡេក្រាម (Telegram) នៅរសៀលថ្ងៃទី២ ខែកុម្ភៈ ថា ស្ថាប័នលោកកំពុងពិនិត្យ និងចាត់ការលើសំណុំឯកសារទាំងនេះហើយ។
ចំណែកមន្ត្រីនៅក្រសួងកិច្ចការនារី ក៏ធ្លាប់បញ្ជាក់ថា ក្រសួងមិនបានមើលរំលងករណីនេះដែរ។
រីឯអ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា រដ្ឋមន្ត្រី លោក ស ខេង បានដាក់បទបញ្ជាដល់អគ្គស្នងការនគរបាលជាតិ ឲ្យស្រាវជ្រាវករណីនេះដើម្បីជូនដំណឹងត្រឡប់ទៅរដ្ឋសភាវិញ៖ «»។
ទាំងក្រុមអង្គការសង្គមស៊ីវិល និងអ្នកតំណាងរាស្ត្រគណបក្សប្រឆាំង រំពឹងថា ក្រសួងពាក់ព័ន្ធនឹងស្វែងរកយុត្តិធម៌ជូននាង ប៉ែន សុគន្ធា។
នាយកប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព លើកឡើងទៀតថា ចំណុចសំខាន់ដែលអ្នកស្រីចង់ឃើញ គឺអាជ្ញាធរពាក់ព័ន្ធមានការស៊ើបអង្កេត និងផ្ដល់ព័ត៌មានពិតដល់សាធារណជន និងក្រុមគ្រួសារនាង ប៉ែន សុគន្ធា៖ «»។
ស្ត្រីរកស៊ីផ្លូវភេទឈ្មោះ ប៉ែន សុគន្ធា ហៅស្រីម៉ៅ បានលង់ទឹកស្លាប់កាលពីយប់ថ្ងៃទី១ ខែមករា បន្ទាប់ពីនាងបានរត់គេចពីក្រុមសន្តិសុខខណ្ឌដូនពេញ ដែលដេញចាប់ក្រុមស្ត្រីរកស៊ីផ្លូវភេទ ក្នុងបំណងរក្សាសណ្ដាប់ធ្នាប់សាធារណៈម្ដុំសួនច្បារខាងក្រោយក្រុមប្រឹក្សាអភិវឌ្ឍន៍កម្ពុជា។ នៅពេលនោះ នាង ប៉ែន សុគន្ធា បានរត់ទៅដួលបោកនឹងទូកទេសចរណ៍ ហើយធ្លាក់ក្នុងទឹកទន្លេសាប។
អ្នកនៅកន្លែងកើតហេតុលើកឡើងថា សន្តិសុខបានហាមប្រាមមិនឲ្យមានអ្នកជួយនាង ប៉ែន សុគន្ធា ឡើយ។ សពរបស់នាង ត្រូវគេរកឃើញនៅមិនឆ្ងាយប៉ុន្មានពីស្ពានច្បារអំពៅ កាលពីថ្ងៃទី៣ ខែមករា។ សុគន្ធា បានបន្សល់ទុកកូនប្រុសពិការមានអាយុ ៦ឆ្នាំម្នាក់៕
RFA
ដោយ សុ ជីវី
